É a parte fundamental da edición, aquela que deixa o texto listo para ser publicado. Tras este concepto de revisión editorial escóndense, en realidade, varios pasos:

A. Lectura crítica e comentario profesional. É o primeiro contacto do editor co texto do autor. Consiste na elaboración dunha análise que valora a eficacia do texto e a súa adecuación aos obxectivos que persegue (non é o mesmo, por exemplo, un texto divulgativo que unha novela). Inclúe tamén unha proposta de modificacións de carácter xeral para melloralo.

Todas as editoriais teñen lectores profesionais que se encargan de revisar o texto dos autores, analizan a súa estrutura e o seu estilo e, opcionalmente, suxiren cambios. No teu caso, como autor independente que decide autopublicar un libro, ti mesmo deberás valorar se o teu texto está xa pechado ou se as suxestións dun profesional poden axudar a puílo antes da súa publicación. É, evidentemente, a túa decisión, como o é o aceptar ou non as recomendacións do lector. Como o resto dos pasos desta guía, é unha opción que deberás valorar.

B. Corrección ortotipográfica e de estilo. Unha vez establecido o texto definitivo, é o momento de revisalo para evitar erros ortográficos e tipográficos. Búscase, por unha banda, axustar o texto ás normas ortográficas da lingua e, por outra, adecuar a súa tipografía aos estándares: coherencia dos tipos de letra utilizados, aplicación de estilos (cursivas, negriñas, redonda, versais...), axuste de bibliografías, cadros, poesías, índices, notas de pé de páxina, citas, etc.

Pola súa banda, a corrección de estilo é máis ampla que a anterior e, sen dúbida, unha das revisións fundamentais nun libro. O obxectivo dunha corrección de estilo é conseguir que o texto flúa axeitadamente, que sexa de fácil lectura, comprensible, sen ambigüidades nin redundancias, ben estruturado, coherente e axustado aos seus obxectivos. O corrector de estilo revisa a estrutura das construcións, a puntuación, o tamaño das oracións, a extensión dos parágrafos, etc.

Ten en conta que, aínda que poden realizarse por separado, estas dúas revisións adoitan realizarse ao mesmo tempo, polo que podes agrupalas nunha soa.

Aínda que, insistimos, todas estas fases da edición dun libro son opcionais, recomendámosche encarecidamente que antes de publicar o teu libro fagas unha revisión ortotipográfica e de estilo.. Ata no texto máis traballado deslízanse erros, con frecuencia numerosos, que afean o resultado final. Ademais, non convén que esta revisión sexa realizada polo autor, pois este “ten os ollos demasiado afeitos” ao texto que escribiu e, a forza de velos, pasaránselle por alto erros que un profesional detectará inmediatamente.

C. Preparación de maqueta. Consiste en dispor o documento para envialo ao maquetista. Para iso, é preciso definir os seus elementos: páxina de créditos, dedicatoria, índice, capítulos, bibliografía...

D. Corrección de probas de maqueta. Aínda que este paso vén logo da maquetación do libro, incluímolo aquí porque é un dos procesos da revisión editorial. Consiste na lectura atenta do texto para detectar que a maqueta está ben axustada en todos os seus elementos (créditos, ISBN, páxinas pares e impares, liñas orfas e viúvas, tipografía de títulos e subtítulos, erros, etc.).

Se queres realizar a revisión editorial do teu libro, recomendámosche:

Só necesitarás un ISBN se pensas comercializar o teu libro dalgunha forma. Se a túa intención é obter un volume para regalar aos teus amigos ou familiares, non é preciso que o rexistres. Pero, se queres vendelo, necesitas un ISBN. Aquí, como sempre, tes varias opcións: podes obter un como autor independente (nesta web explican como); podes utilizar o que nós ofrecemos de forma gratuíta, o que quererá dicir que o teu libro sairá publicado co selo de Edicións Redelibros e que terás que asinar un contrato autorizándonos a publicar o teu texto (moi libre, como poderás ver; se queres botarlle un ollo, descárgao aquí); ou, tamén, poderás utilizar o ISBN dalgún dos nosos colaboradores, como Meubook ou Niké.

Respecto do rexistro: convén que antes de publicar o libro o rexistres para que se recoñeza oficialmente a túa autoría. Para iso, recomendamos a páxina www.safecreative.org, dende a que poderás realizar todas as xestións necesarias e que ofrece a mesma seguridade xurídica que, por exemplo, o Rexistro da Propiedade Intelectual. Con outra vantaxe, ademais da comodidade: poderás elixir entre unha ampla variedade de reserva de dereitos, desde o copyright ao copyleft, pasando por Creative Commons.

Se queres encargar a xestión do ISBN, recomendámosche:

Unha vez teñas o texto definitivo corrixido e editado, é o momento de envialo ao maquetista para convertelo nun pdf de alta calidade preparado para imprenta. A complexidade do proceso depende, como é lóxico, do propio texto: non é o mesmo maquetar un ensaio matemático ou un libro de texto que unha novela. Por iso, deberás valorar se ti mesmo podes realizar esta fase ou prefires que se encargue diso un profesional.

Unha vez maquetado, o texto debería volver pasar polas mans do editor para a corrección das probas de maqueta: para comprobar que está ben axustada en todos os seus elementos (é o punto 1.D. desta guía). Ten en conta que o lector verá o libro final exactamente da mesma forma na que está neste pdf.

Se queres encargar a maquetación do teu libro, recomendámosche:

O deseño da portada é máis importante do que a primeira vista parece, pois trátase do primeiro elemento do libro que atraerá ―ou afastará― a atención do posible lector. Se es creativo, podes deseñala ti mesmo, ou pedirllo a algún amigo. Recomendamos, iso si, que antes visites unha librería ou a túa propia biblioteca para localizar aqueles aspectos que converten a unha portada en atractiva: a tipografía, a ilustración, a composición do título e o nome do autor, etc. Se non queres complicar a vida, ofrecémosche dúas opcións: encargarlla a un deseñador (aquí abaixo tes algunha opción) ou, máis fácil aínda, utilizar a nosa portada xenérica... cambiando, iso si, o título e o nome do autor.

Se queres encargar unha portada para o teu libro, recomendámosche:

É evidente que a calidade da impresión é un elemento fundamental para que un libro resulte atractivo. Hoxe en día estase impondo, grazas ás novas tecnoloxías, un sistema de impresión revolucionario: a impresión baixo demanda. Este é o servizo que recomendamos se queres ver o teu libro en papel, pois supón grandes aforros para o editor (neste caso, para ti mesmo). A impresión baixo demanda (POD, Print on Demand, nas súas siglas en inglés) evita a necesidade de grandes tiradas. Permite imprimir o libro unidade a unidade, a medida que un lector quere adquirilo, mediante unha orde emitida desde o punto de venda (a librería online, habitualmente) á imprenta, que é a que se encarga, en última instancia, de facelo chegar ao comprador.

A nosa recomendación, en todo caso, é que fagas unha tirada inicial algo máis numerosa que necesitarás para a promoción do libro, para distribuír aos teus coñecidos ou no caso de que decidas polo á venda en librerías físicas. Despois, o sistema POD permitirache ir obtendo máis volumes a medida que os necesites.

Se queres encargar a impresión do teu libro, recomendámosche:

O epub estase convertendo a toda velocidade no formato estándar do libro dixital grazas á súa versatilidade: permite a súa lectura en todo tipo de aparellos electrónicos, xa sexan ereaders, tablets, smartphones, ordenadores... E ten unha gran vantaxe sobre a impresión: só é necesario realizar o proceso unha vez. Evidentemente, ti mesmo deberás valorar se desexas comercializar o teu libro en formato papel, dixital ou ambos, pero recomendamos que non deixes de lado esta opción: non só resulta económica, senón que, unha vez obtido o libro dixital, poderás distribuílo sen esforzo por un crecente número de librerías electrónicas.

Se queres encargar a conversión a EPUB do teu libro, recomendámosche:

En Redelibros pomos á túa disposición unha serie de “ferramentas para autores” que axudarán a promocionar a túa obra. Ademais da propia ficha do libro na nosa base de datos (con enlace directo para a súa venda), poderás dispor dunha páxina de autor na nosa rede e dunha tenda online tanto en Redelibros como en Facebook para vender o teu libro en papel ou en dixital. Ademais, poderás utilizar a canle de vendas de Meubook. Ao mesmo tempo, en Redelibros estamos falando con varias tendas online como Amazon para abrir nelas a nosa propia tenda virtual, na que, se o desexas, poderás incorporar tamén o teu texto.

Se pensas ademais en distribuír o libro en librerías físicas, fala con nós. Valoraremos o seu contido e, se se axusta aos nosos estándares, distribuirémolo en librerías de toda Galicia a través da Distribuidora Pragma, do grupo Niké. Así mesmo, estamos negociando con algunha rede estatal para estender a distribución dos nosos libros a todo o territorio do Estado.

Se buscas unha plataforma de venda para o teu libro, podes contactar con: