Redelibros Televisión, precisamos da vosa axuda!

• Publicado por Redelibros 08 Setembro 2011 - Arquivado en Redelibros - #Cultura  #televisión  #audiovisuais  - 616 visitas

  Boas de novo!

  
  

  Se pensabades que vos iamos deixar descansar, témome que non... Algúns teredes visto que no último proceso de actualización apareceu durante algún tempo un enlace desde o menú principal a unha páxina: Redelibros Televisión.
  
  Pero agora xa non está. Decidimos quitalo... polo de agora. Porque había algún detalle que puír, pero sobre todo porque queremos pedirvos a vosa colaboración. E é que, aínda que contamos con algún "material", non é suficiente.
  
  E aí é onde entrades vós. O obxectivo de Redelibros Televisión, tal e como o vemos, é ofrecer coobertura aos acontecementos culturais do país: presentacións de libros, feiras, recitais, etc. E, tamén, achegar os escritores, ilustradores, tradutores, editores, libreiros, bibliotecarios e demais aos lectores.
  
  Así que esta é a nosa proposta: quen quere converterse en reporteiro de Redelibros Televisión? Apetécevos colaborar? Gustaríanos contar convosco para que nos enviásedes vídeos de entrevistas, creativos, reflexións gravadas sobre unha obra ou calquera outro audiovisual que se vos poida ocorrer. Se, por exemplo, asistides a unha presentación, por que non gravala e enviárnola? (Basta co móbil, asegurámosvolo, é o que utilizamos nós para gravar algunha das presentacións que vistes, e con calidade máis que decente). Se ledes un libro que vos chama especialmente a atención, por que non comentalo nun vídeo? Se coñecedes a algún autor, animádesvos a facerlle unha entrevista? Se sodes autores vós mesmos, por que non falar do voso traballo nun audiovisual? Se preparastes o booktrailer dun libro, a que esperades para enviárnolo?
  
  Como vedes, as opcións son moitas. E, entre todos, estamos seguros de que conseguiremos unha televisión viva, interesante, dinámica e, sobre todo, moi nosa.
  
  Outra proposta máis: moitos levades meses connosco, participades activamente na rede, sodes parte integrante desta casa común. Quen se anima a gravar un pequeno "anuncio" sobre Redelibros? Pode ser moi breve, uns segundos, ou tan longo como queirades. Trátase de dicirlle ao mundo que é Redelibros... ou que é Redelibros para vós. Lanzádesvos á aventura?
  
  Aqueles que queirades colaborar, ben porque teñades xa algún audiovisual, ben porque esteades pensando en gravar algún acto, poñédevos en contacto connosco a través do noso correo habitual (tédelo abaixo, en "contacto") ou escribindo a redelibros@redelibros.com.

  
  Grazas unha vez máis, redelibreir@s!